सेना फिर्ता गर भनेपछि गृहमन्त्री गौतमले एमाओवादी सभासदलाई यसरी हप्काए

स्रोत-दैनिक नेपाल>>>काठमाडौं, २७ भदौ । तराई मधेसबाट प्रतिनिधित्व गर्ने एमाओवादीका सभासदहरुले मधेसमा भैरहेको आन्दोलनमा राज्यपक्षबाट दमन भैरहेको भन्दै गृहमन्त्री वामदेव गौतमको ध्यानाकर्षण गराएका छन् ।
प्रमुख सचेतक गिरिराजमणी पोख्रेल, प्रभु साह लगायतका सभासदहरुले आइतबार गृहमन्त्रीलाई भेटेर तराईको जनजीवन सामान्य बनाउन सरकार अधिकतम लचक हुनुपर्ने भन्दै सेना फिर्ता लिन, कर्फ्यू हटाउन र सम्वादबाटै समाधान खोज्न आग्रह गरेका हुन् ।
सेना फिर्ता लिने र कर्फ्यू हटाउने विषयमा प्रवेश भएसँगै गृहमन्त्री गौतमले एमाओवादी सभासद्को टीमलाई हप्काएका छन् । मधेस आन्दोलन राजनीतिक नभएको भन्दै आन्दोलनका नाममा आतंक मच्चाउने काम भइरहेकाले सेना कुनै हालतमा नफर्किने जवाफ दिएका थिए ।
भेटमा गृहमन्त्रीले कैलालीको टीकापृुर, महोत्तरी लगायतका जिल्लामा भएको हिंसात्मक घटना राजनीतिक आन्दोलन हुनै नसक्ने जिकिर गरेका थिए । ‘म कर्फ्यू हटाउँछु, सेना फिर्ता लिन्छु तर मधेसमा भएको सबै घटनाको जिम्मेवारी तपाईंहरु लिनुहुन्छ ?’ गृहमन्त्री एमाओवादी सभासद्लाई प्रश्न गरे ।
एमाओवादी सभासदहरुको भेटमा गृहमन्त्री गौतम एकदमै आक्रमक रुपमा प्रस्तुत भएका थिए । मधेस आन्दोलन हिंस्रक भएको भन्दै अहिले अवस्था सेना परिचालन फिर्ता गर्दाको परिणाम सोच्न पनि गृहमन्त्रीले सुझाव दिएका छन् । गृहमन्त्री गौतमसँगको भेटमा एमाओवादी सभासदहरुले मधेस आन्दोलनले सरकार र मधेसबीचको दुरी झन् बढाउने चिन्ता व्यक्त गरेका छन् ।